Gen 28 | NdeIBE | STEP | Yikho u-Isaka wabiza uJakhobe wambusisa wamlaya wathi: “Ungathathi umfazi womKhenani.

Genesis 28

1 Yikho u-Isaka wabiza uJakhobe wambusisa wamlaya wathi: “Ungathathi umfazi womKhenani. 2 Hamba khathesi uye ePhadani Aramu, emzini kayihlomkhulu uBhethuweli. Thatha khona umfazi, emadodakazini kaLabani, umnewabo kanyoko.

3 Sengathi uNkulunkulu uSomandla angakubusisa akuphe inzalo, andise ubunengi bayo lize libe yizizwe ezinengi. 4 Sengathi angakupha wena kanye lezizukulwane zakho isibusiso leso esaphiwa u-Abhrahama, ukuze lilithathe ilizwe leli ohlezi kulo manje njengowezizweni, ilizwe uNkulunkulu alipha u-Abhrahama.” 5 Yikho u-Isaka wasemvalelisa uJakhobe, waya ePhadani Aramu, kuLabani indodana kaBhethuweli umAramu, umnewabo kaRabheka, owayengunina kaJakhobe lo-Esawu.

6 U-Esawu wezwa ukuthi u-Isaka wayembusisile uJakhobe njalo wamthumela ePhadani Aramu ukuthi ayothatha umfazi khona, lokuthi wathi embusisa wamlaya wathi, “Ungathathi umfazi ongumKhenani,” 7 lokuthi uJakhobe wayebalalele oyise lonina wahamba waya ePhadani Aramu.

8 U-Esawu wakunanzelela ukuthi abafazi bamaKhenani babeyisinengiso kuyise u-Isaka;

9 yikho wasesiya ku-Ishmayeli wathatha uMahalathi, udadewabo kaNebayothi, indodakazi ka-Ishmayeli indodana ka-Abhrahama, phezu kwabanye abafazi ayevele eselabo.

Iphupho likaJakhobe eBhetheli

10 UJakhobe wasuka eBherisheba waqonda eHarani. 11 Wafika kwenye indawo, wema lapho ukuthi alale khona ngoba ilanga laselitshonile. Wathatha ilitshe khona walenza umqamelo walala. 12 Wehlelwa liphupho wabona ilele ligxile phansi emhlabeni, isiqongo salo sifinyelela ezulwini, kwathi izingilosi zikaNkulunkulu zabe ziqansa zisehla kulo.

13 Laphaya ngaphezu kwalo kwakumi uJehova esithi: “NginguJehova, uNkulunkulu kayihlo u-Abhrahama loNkulunkulu ka-Isaka. Ngizakupha wena kanye lezizukulwane zakho ilizwe leli olele kulo. 14 Izizukulwane zakho zizakuba njengothuli lomhlabathi, yikho lizaqhela liye entshonalanga lasempumalanga, enyakatho laseningizimu. Bonke abantu bomhlaba bazabusiswa ngenxa yakho lenzalo yakho.

15 Ngilawe njalo ngizakulinda loba ungaze uye ngaphi, njalo ngizakubuyisa kulelilizwe. Kangizukukudela ngize ngikwenze lokho engikuthembise khona.”

16 UJakhobe wathi evuka ebuthongweni bakhe wacabanga wathi, “Ngeqiniso uJehova ukhona kule indawo, kodwa ngibe ngingakunanzeleli.” 17 Wesaba wathi, “Yeka ukwesabeka kwale indawo ehloniphekayo! Ngempela iyindlu kaNkulunkulu; leli lisango lasezulwini.”

18 Ngakusasa ekuseni kakhulu uJakhobe walithatha ilitshe ayelele eliqamele walimisa laba yinsika wathela amafutha phezu kwalo.

19 Indawo leyo wayibiza wathi yiBhetheli, ikanti idolobho lakhona lalithiwa yiLuzi.

20 Ngakho uJakhobe wenza isifungo wathi, “Uma uNkulunkulu ezakuba lami angilondoloze kuloluhambo engikulo, angiphe ukudla lezigqoko, 21 ngibuyele emzini kababa ngiphilile, lapho uJehova uzakuba nguNkulunkulu wami

22 njalo lelitshe leli engilenze insika lizakuba yindlu kaNkulunkulu, njalo kuzakuthi konke onginika khona ngizakunika wena ingxenye yetshumi.”